རྟོགས་ལྡན་ཆོས་འཕེལ་བཟང་པོ་ལ་ཕུལ།
༄༅། །རྟོགས་ལྡན་ཆོས་འཕེལ་བཟང་པོ་ལ་ཕུལ། ཕ་མཚུངས་མེད་བླ་མའི་ཞབས་ལ་འདུད། །ཆོས་དབུ་མ་ཕྱག་རྒྱ་རྫོགས་ཆེན་སོགས། །ལམ་ཟབ་མོའི་ལྟ་བ་མང་ལགས་ཀྱང་། །དོན་བློ་བྲལ་གྱི་ཡེ་ཤེས་མ་རྟོགས་ན། །ཡིད་དཔྱོད་ཀྱི་འཛིན་པས་རང་གཞན་འཆིང་། །ད་གཏན་མེད་དུ་ཉོལ་དང་རྟོགས་ལྡན་པ། །བདེ་བ་དང་གསལ་དང་མི་རྟོག་སོགས། །ཉམས་སྣ་ཚོགས་ཀྱི་འཆར་སྒོ་མང་ལགས་ཀྱང་། །རང་རིག་པའི་རང་རྩལ་མ་རྟོགས་ན། །ཡིན་སྙམ་གྱི་སྒོམ་གྱིས་བསླུ་ཉེན་གདའ། །ད་རང་བབ་ཏུ་ཞོག་དང་རྟོགས་ལྡན་པ། །མཚམས་སྒྲུབ་དང་བཟླས་བརྗོད་དཀའ་ཐུབ་སོགས། །ཆོས་སྤྱོད་ཀྱི་རྣམ་གྲངས་མང་ལགས་ཀྱང་། །རང་གྲོལ་གྱི་གནད་དང་མི་ལྡན་ན། །རྐྱེན་ཐོག་ཏུ་བབ་ཚེ་རང་མཚང་ངོམ། །གདེང་གྲོལ་ཐོག་ཏུ་ཆོས་དང་རྟོགས་ལྡན་པ། །ཞལ་གཟིགས་དང་ལུང་བསྟན་གྲུབ་རྟགས་སོགས། །ཉམས་རྩལ་གྱི་རྣམ་པ་མང་ལགས་ཀྱང་། །དོན་རིག་པའི་བཙན་ས་མ་ཟིན་ན། །བཟང་རྟོག་གི་སྒྲོག་གིས་འཆིང་ཉེན་གདའ། །ཀ་དག་གི་གཏན་སྲིད་འཛིན་རེ་རན། །ཚུལ་དེ་སྐད་ལྟ་སྒོམ་སྤྱོད་པའི་གླུ། །ཕ་མཚུངས་མེད་བླ་མའི་བཀའ་དྲིན་གྱིས། །བུ་ང་ཡི་བློ་ལ་གོ་མྱོང་སྐྱེས། །ཁྱེད་དད་དམ་དག་པའི་རྟོགས་ལྡན་ལ། །ཚིག་སྦ་གསང་མེད་པར་ཕུལ་བ་ལགས། །ཐུགས་མཉེས་པར་མཛོད་ཅིག་རི་ཁྲོད་པ། །དགེ་དེས་ཀྱང་འགྲོ་ཀུན་ཀློང་གྲོལ་ཤོག །ཅེས་པའང་སྙོམ་ལས་པ་པདྨ་བི་ཛས་རྟོགས་ལྡན་ཆོས་འཕེལ་བཟང་པོ་ལ་ཕུལ་བ་དགེ།